مدونة

يعني ايه ….تكون متداول محترف

المدونة

يعني ايه ….تكون متداول محترف

المتداول المحترف ….مصطلح شكله حلو …لكن يا ترى احنا فاهيمنه بالطريقة الصحيحة…

النهاردة عايزين نتكلم عن أهم خصائص المتداول المحترف وايه معنى انك تكون متداول محترف 

الإجابة على السؤال ده …حتكون صادمة لناس كتير …لان كلمة متداول محترف ليها مفاهيم مغلوطة عند الناس 

خلينا نوضح شوية حاجات مع بعض 

اولا.… اول ما تقول متداول محترف يجى فى دمغنا طبعا مديرين صناديق الاستثمار ومدريين الاستثمار فى البنوك الكبيرة…. دول بقى اعلى احترافيه وعمرهم مابيخسرو ….احب اقولك ان حتى دول بيخسرو ملايين بل ومليارات كمان …. والتاريخ مليان اثبتات عن صناديق استثمار أعلنت إفلاسها. 

حتى لما نشوف أداء صناديق الاستثمار حنشوف  ان معظم الصناديق بتحقق نسب ربح قليلة جدا مقارنة بنسب ارتفاع المؤشر العام للسوق…..

طبعا بتقولى طيب ليه بيخسرو وهما محترفين ….الإجابة على السؤال ده اشارنا  ليها فى بوست سابق لما قولنا ان من أهم عوامل نجاحك كمتداول  محترف أنك تطبق Risk Management  إدارة المخاطرة على رأس مالك وتداولاتك ….(حنعمل بوست منفصل عن إدارة المخاطر) وديه من اكتر الحاجات إللى يتسبب خسارة للكل سواء أفراد أو صناديق فى حالة عدم الألتزام بتطبيقها… 

ثانيا…. من الحاجات إللى  بتميز المتداول المحترف  انه ميش بيركز على النتيجة 

حتقولى ازاى يعنى …ميش مهم انه يخسر أو يكسب …..

حقولك ايوه بالظبط كده 

فى الاول انت محتاج تعود  نفسك ازاى تمشى على السيستم وديه حاجة ميش سهلة ولكنها مهمة جدا 

يعنى انت فى الاول اختارت استراتيجية تداول وجربتها ومع اول تريدة خسرت …حتعمل ايه طبعا حتقول ان الاستراتيجية غلط وتدور على حاجة تانية وتجربها وتخسر برضه وتفضل تجرب طريقة فلان وعلان …لغاية ما تصفر  المحفظة ..

انت لازم تبقى عارف ان الخسارة ديه بتبقى جزء لا يتجزأ من عمليه التداول 

ولكن طبعا زى ما قولنا قبل كده الريسك بيكون محسوب .

علشان تبقى متداول ناجح ومحترف الاهم انك تختار الاستراتيجية اللى تناسب شخصيتك ووقتك وبعدين الاهم منه  انك تمشى على السيستم وتلتزم بنقاط وقف الخسارة وجنى الأرباح…اهم حاجة انك تعود نفسك على الالتزام بالخطة والاستمرار …

وبعدين بعد عدد معين من التريدات…نقيم الاستراتيجة ونشوف نسب نجاحها اد ايه …واكيد حندور على أخطائنا وتعديلها ونطور الاستراتيجية …..

أؤكد للك النتيجة فى الاخر حتكون مبهرة جدا …لغاية ما نوصل لهدف انك تكون ماشى على استراتيجية بتحقق أرباح بأستمرار..

ثالثا…..  المتداولين المحترفين عارفين وفاهمين وواقعيين فى تحديدهم لنسبة الربح المتوقعة من التداول 

يعنى ايه الكلام ده …كتير من الناس فاكرة التداول والبورصة مغارة على بابا ..وانهم حيخشو ويحققوا أرباح ١٠٠% و٢٠٠% فى شهر أو اقل …

طبعا الكلام ده غلط وميش هو السائد….لازم تكون واقعى وعندك سيستم ماشى عليه….

انت عارف ان افضل المتداولين تتراوح نسب ربحهم من ١٥% إلى ٢٥% سنويا 

طبعا النسب ديه ممكن تزيد أو تقل على حسب حالة السوق…لكن ايه اهم حاجة انهم يحققوا ده باستمرار سنة ورا سنة ….علشان عندهم سيستم ماشين عليه واستراتيجية التداول دايما بيطوروها….

رابعا….. اهم حاجة بتميز المتداولين المحترفين 

وهى انهم بيهتموا اكتر بتنمية عقولهم اكتر من اهتمامهم بتنمية رأس المال 

المتداولين المحترفين لو فرضنا انهم خسروا كل رأس مالهم …انت عارف انهم يقدروا يعوضوا إللى خسروا…حتى لو الرحلة صعبة وطويلة….عارفين ليه….

علشان هما خسروا الفلوس لأى سبب…. لكن مخسروش عقليتهم إللى قدروا يطوروها وكمان السيكولوجى الخاص بيهم نتيجة التزامهم بقواعد الاستراتيجية وتحكمهم فى سيكولوجية التداول الخاصة بيهم…

وده من اسرار نجاحهم. 

دايما المتداولين العاديين بيعانوا من حاجتين …

الاولى انهم بيكونوا  خايفين جدا من الخسارة يعنى لو دخل تريدة وخسر حيخاف يخش اللى بعدها حتى لو نسب نجاحها أعلى. 

تانى حاجة بيكونوا غير واثقين فى نفسهم ولا حتى فى طريقة التداول إللى ماشين بيها 

علشان كده بيجربوا اكتر من طريقة و يفضل مسلسل الخسارة مستمر…