مدونة

ليه معظم المحللين الفنين بيخسروا أموالهم في البورصة

المدونة

ليه معظم المحللين الفنين بيخسروا أموالهم في البورصة

فيه كتير من الناس اللى دارسة تحليل فنى وعندههم من الأدوات انهم يقدرو يتوقعو حركة السوق والأسهم وأحتمالات صعود او هبوط السهم بأختلاف مدارسهم او ادوات التحليل المستخدمة .

ولكن كام نسبة من الناس ديه اللى قدر يستفيد من تحليله و يحقق ربح من الفرص اللى ظهرت نتيجة تحقق التحليل الفنى .

الحقيقة والواقع بيقول ان النسبة لا تتعدى 10% بس من المحللين اللى بيقدرو يحقق ربح …

وده بيرجع لعوامل كتير ومنها سيكولوجى التداول … يعنى ايه مثلا :

تلاقى الواحد عامل تحليل لسهم ومتوقع مثلا ارتداده من نقاط دعم معينة …وفعلا السهم يوصل للنقاط المحددة ويبدأ الأرتداد منها ..

لكن صاحبنا بقى عمل ايه …تلاقيه مراقب السهم لما يوصل للدعم وبيرتد منه …لكن هو لسه ميش مقتنع ولا يستطيع ان يأخد القرار بالشراء بالرغم انه مقتنع بتحليله ..

طيب ليه ؟؟؟ خايف ..؟؟

 تلاقيه بيقول لنفسه ديه ارتداده ضعيفة والسهم حيكمل نزول …طيب استنى شويه واتأكد انه فعلا حيعكس اتجاه !!

كل التساؤلات ديه بدور فى دماغه وبالتالى بيفضل متردد وعقله مشوش فى اتخاذ اى قرار وفى الأخر ميعملش اى حاجة !!

وبعد ما السهم يصعد ويوصل لمستهدفه ..تلاقيه بيقول لنفسه والله كنت عارف ومحلله ومتوقع كل ده !! طيب انت عملت ايه ؟؟؟ ولا حاجة

طيب وبعدين ايه الحل ..الموضوع ده كتير بيحصل خصوصا مع الناس اللى دارسه تحليل فنى وفاهمه كويس 

ايوه برضه نعمل ايه علشان نتغلب على النقطة ديه ؟

الأول لازم نفهم ان علم التحليل الفنى هو فى الأساس علم احتمالات يعنى مفيش حاجة مؤكده ..لكن فيه نسب ترجيح بتكون اعلى من التانيه .

وانت لما بتحلل سهم معين طبقا لأى مدرسة من مدارس التحليل الفنى …انت بتتوقع مناطق دعم ومقاومة للسهم طبقا  لقوى العرض والطلب اللى بتترجم قدامك على الشارت من البيانات التاريخية (يعنى هو توقع وتحليل مبنى على سلوك سابق للسهم عند بعض مناطق العرض والطلب )

يعنى عايزك تعرف ان مفيش اى حاجة مؤكده يعنى ميتفعش حد يقولك لازم السهم يرد من هنا او ينزل من المناطق ديه ..فيه احتمال انه ينزل وده ترجيحه بيكون اعلى لو كسر الدعم ده مثلا .

طيب والحل ايه بقى ؟؟ كده الكلام كله فى الهوا ..هههههه

انا حقولك على تلات نقاط مهمين جدا  لازم تتعلمها وتفهمها كويس جدا 

  أولا -انك لازم يكون عندك استراتيجية واضحة للتدول بتتناول كل حاجة فى عمليه التدوال 

يعنى تكون واضح فيها  تحديد نقاط الشراء او البيع واشارات الشراء وكذلك الأستوب لوس وايضا مناطق جنى الأرباح (طبعا ده موضوع محتاج اكتر من بوست حنشرحه لاحقا ).

ثانيا – لازم تكون محدد منطقة الشراء بتاعتك عند مناطق الدعم والطلب ..طيب خلاص كده لما السهم يوصلها اخش اشترى ؟؟؟ أقولك لأ طبعا 

فى الأول انت حددت منطقة محتمله للدعوم ممكن توقف السهم وبعدين نبتدى نراقب سلوك السهم فى المنطقة ديه ونشوف السهم حيعمل ايه لو فى بوادر ارتداد حقيقية ..يبقى ديه اشارة الشراء بتاعتك .

طيب اشتريت السهم بناء على اشارات الشراء اللى انت حددتها مسبقا ..يبقى لازم تكون محدد طبعا الأستوب لوس بتاعك وتلتزم بيه .

طيب فاضل ايه كمان .؟؟  لازم بشكل مبدئ تكون عارف مناطق المقاومة او العرض للسهم بتاعك وديه بنسميها منطاق جنى ارباح اوليه .

ثالثا – طيب حنعمل ايه بعد كده ..المرحلة اللى جايه وديه بنسميها مرحلة ادارة التريدة “Trade Management”   يعنى انت اشتريت ومحدد نقاط الأستوب والبروفيت تارجت ..كده انت فى السليم ؟؟ خلاص نقعد بقى نتفرج لغاية ما السهم يوصل للبروفيت تارجت بتاعك او لا قدر الله يضرب الأستوب لوس…!! 
اقولك لا طبعا انت فى مرحلة الأدارة  ديه بتابع سلوك السهم بعد الشراء وتشوف البرايس اكشن بيقول ايه علشان لو السهم متحركش فى اتجاه التريده بتاعتك وبدأ تبان اشارات ضعف معينة (حنشرحها بالتفصيل بعدين) يبقى هنا لازم ادخل وما استناش يضرب الأستوب بتاعى علشان اقلل الريسك …… ديه حاجة من ضمن ادارة التريدة  لسه فيه حاجات كتير محتاجين ناخد قرار فيها بعد ما نشترى , حنشرحها بالتفصيل فى بوست منفصل .       

Select the fields to be shown. Others will be hidden. Drag and drop to rearrange the order.
  • Image
  • SKU
  • Rating
  • Price
  • Stock
  • Availability
  • Add to cart
  • Description
  • Content
  • Weight
  • Dimensions
  • Additional information
  • Attributes
  • Custom attributes
  • Custom fields
Click outside to hide the compare bar
Compare
Wishlist 0
Open wishlist page Continue shopping